Në zgjedhjet e sivjetme parlamentare federale të Zvicrës, të zhvilluara me 22 tetor 2023, siç ka raportuar edhe portali ynë prointerega.ch, Islam Alijaj mori 95’054 vota, që atij i siguruan ulësen në parlamentin zviceran, me çka thyen akullin dhe hap perspektiva për politikan tjerë shqiptaro-zviceran. Historia e tij shërben si frymëzim dhe dëshmi e mundësive të papara që Zvicra ofron, pavarësisht sfidave të ndryshme. Për këtë arritje historike nuk mungoi, para së gjithash, edhe mbështetja e aktivistëve sindikalistë shqiptaro-zviceranë të Unia Regjioni Cyrih-Shafhauzen me në krye Xhafer Sejdiun dhe Qendrës “Parandalo” të Cyrihut me në krye Valdete Hotin.
Suksesi i tij në zgjedhjet parlamentare federale është një arritje e jashtëzakonshme dhe një hap i rëndësishëm drejt përfshirjes së komunitetit shqiptar në skenën politike zvicerane. Angazhimi i tij në luftën për të drejtat e njerëzve me aftësi të kufizuara është padyshim një kontribut i çmuar dhe një shembull për të gjithë ata që ballafaqohen me pengesa të ngjashme. Një politikan me një perspektivë të tillë inkurajon përfshirjen dhe përfaqësimin e grupeve të ndryshme në vendimmarrje. Përmes rrugëtimit të tij dhe arritjeve të tilla, Islam Alijaj shërben si një shembull i frymëzimit për të gjithë ata që sfidohen nga pengesat dhe duan të kontribuojnë në ndryshime pozitive në shoqëri.
Në të ardhmen, besojmë se roli i tij në parlamentin zviceran do të sjellë ndryshime pozitive dhe do të ndihmojë në përfaqësimin më të mirë, në njërën anë të çështjeve të komunitetit shqiptar dhe përfshirjen e të gjithë migrantëve në politikëbërje dhe në anën tjetër të njerëzve me aftësi të kufizuara dhe grupeve të margjinalizuara në përgjithësi.
Në vijim, me pak vonesë, po botojmë shkresën e sindikalistëve shqiptaro-zviceran me urimin për Islam Alijaj, menjëherë pas zgjedhjes së tij deputet federal në parlam
I nderuar Zotëri Deputet Federal!
I dashur Islam!
Komuniteti shqiptar në Zvicër ka bërë një rrugëtim të gjatë, një rrugëtim me ngritje dhe me rënie, me sfida e përpjekje, por megjithatë një rrugëtim për të cilin sot me bindje mund të themi se ia ka vlejtur.
Fitorja jote si deputet federal shënon një arritje historike, një arritje qe vlerëson angazhimin tënd për të drejtat e personave me aftësi të kufizuara dhe atyre më të pafuqishmit në shoqërinë tonë, por dhe vlerëson mundin e prindërve dhe gjyshërve tanë, të cilët me dekada kanë investuar për ardhmërinë fëmijëve dhe mbesave dhe nipërve të tyre, të cilën ne sot mundemi ta gëzojmë në shoqërinë zvicerane dhe atë shqiptaro-zvicerane.
Urime nga aktivistë shqiptarë të Unia!
Si një grup aktivistësh shqiptarë në Unia ne jemi angazhuar me vite të tëra për një shoqëri të barabartë, për fuqizimin e komunitetit tonë dhe migrantët kudo në Zvicër si dhe për fuqizimin e të drejtave të punëtorëve. Ne të gjithë mbajmë përgjegjësi për përparimin e të drejtave të punëtorëve, personave me aftësi të kufizuara, migranteve dhe migrantëve, shtresave te ulëta dhe në bashkëpunim me ty dhe forca tjera politike të majta të bëjmë më të mirën për këto shtresa të shoqërisë tonë.
Për çdo ndihmë, bashkëpunim dhe përkrahje, dera jone e bashkëpunimit do të jetë e hapur dhe je i mirëseardhur në mesin tonë në çdo kohë.
Edhe njeherë, Urime të përzemërta!
Sindikalistët dhe rrjetet tona shqiptaoro-zvicerane të bashkëkoordinuara në strukturat e platformat tjera, nga të cilat po veçojmë migrantët siocialdemokratë të PSd, parandalo e prointegra, shprehin bindjen e tyre se bashkëpunimi disavjeçar dhe mbështetja e ndërsjellë e deritashme në të ardhmen do të përparojë edhe më tej në të mirë të punëtorëve, të komunitetit shqiptar si dhe grupeve tjera të margjinalizuara shoqërore. Shpresojmë gjithashtu që kjo arritje e suksesshme do të shërbejë edhe si model shembullor edhe për avancimet shoqërore në vendet tona amë dhe gjithandej!
